Generic selectors
Exact matches only
Search in title
Search in content
Search in posts
Search in pages
wpfc_sermon
wpfd_file

Ian matrikuleer aan die Hoër Volkskool, Potchefstroom in 1979. Studeer daarna aan die Noordwes Universiteit en behaal die grade BA en BA Honns (Grieks). Studeer verder aan die Universiteit van die Vrystaat en behaal die grade MA (Grieks), BTh en MTh (Nuwe Testament). Hy voltooi sy doktorale studie in 1996 aan die Universiteit van Pretoria en werk oor vormgewing in die prediking onder leiding van Prof. Cas Vos.

Na sy studies doen hy diensplig as Lugmagkapelaan te Bloemspruit Lugmagbasis. In 1990 is hy na Suidkus-gemeente in Amanzimtoti beroep en in 1997 na Sonstraal-gemeente in Durbanville.

Hy begin op 1 Julie 2007 by die Fakulteit Teologie aan die Universiteit van Stellenbosch as Senior Lektor in Praktiese Teologie en Missiologie binne die spesifieke vakgebied: Bedieningspraktyk. Op 1 Julie 2012 is hy tot mede-professor en op 1 Julie 2016 tot vol professor bevorder en is onder andere die program koördineerder van die professionele M Div-graad en die Nagraadse Diploma in kerklike bediening. Hy is ook die akademiese koördineerder van ’n Meestersgraad in missionale leierskap. Hy is veral geïnteresseerd in leierskapsvorming en -onderrig by jongmense en volwassenes, in die bedieningspraktyke van geloofsgemeenskappe (gemeentes) en die rol van die kerk in die samelewing.

Publikasies: Redakteur van twee uitgawes (1990, 2000) van die Bybel dagboek, Seisoene van God se jaar, Outeur van Ons ware ID is Jesus (2000) en Blydskap wat bly (2004). Mederedakteur van Nuwe Testament visies op die kerk en Kruisgewys Boekklub. Hy lewer verskeie bydraes in Woord teen die Lig, en Omdat ons klein is (2002), almal Lux Verbi-BM publikasies en verskeie artikels in wetenskaplike en populêre tydskrifte. Saam met Ockert Meyer en Robert Vosloo is hy ook medeskrywer van God se antwoord is ‘n vraag (2004), Lux Verbi-BM. Sedert sy skuif na die akademie het hy reeds 50 artikels in geakkrediteerde vakwetenskaplike tydskrifte en 15 hoofstukke in boeke gepubliseer en is deel van verskeie nasionale en internasionale vakwetenskaplike werkgemeenskappe. Sy nuutste publikasie is “Together in God’s theatre”: Practical Theology in an African context (2020).
Ian is getroud met Judy, ‘n fisioterapeut, werksaam by Jan Kriel Skool in Kuilsrivier en hulle het twee kinders: Elzette wat ‘n bedryfsielkundige is by die Pep-groep en Guillaume wat ‘n stad- en streeksbeplanner is by die stad Kaapstad.