Daar was in daardie tyd ‘n groot droogte in die provinsie Judea, waarbinne Jerusalem ook geval het. Die Christene in Jerusalem – die moederkerk waar alles begin het – het veral swaar gekry; hulle het letterlik honger gely. Toe loods Paulus ‘n fondsinsamelingsprojek in die gemeentes van Masedonië en Korinthe. Oor dié dankoffer wat die gemeentes uit Griekeland toe vir hulle susters en broers in die veraf Israel ingesamel en aangestuur het, gaan hoofstuk 8 en 9 van die tweede Korintiër brief. Paulus was verras dat hulle soveel geld kon aanstuur. Maar hy moedig hulle aan om nog meer te stuur, want die nood in Jerusalem was groot.