Oor dié teks word gewoonlik op Palmsondag gepreek. Dit gaan oor Jesus wat Jerusalem op die rug van ‘n donkie  binnegery het, sy kruisdood tegemoet. Maar dis ook as preekteks voorgeskryf vir die eerste Adventssondag. Dis vol verwagting, opwinding. Jesus kom, Hy kom as die Messias, die Koning … en  Hy kom op die rug van ‘n donkie!

“Op die rug van ‘n donkie” … dis nie so ‘n onskuldige sinnetjie nie. Daarin sit diep simboliek. ‘n Donkie is inderdaad méér as net ‘n deerniswekkende dier. My liewe vrou is vreeslik lief vir donkies.  Ons hele huis hang vol donkie-prente. Hoekom dan donkies? Ronel se pa is destyds in Wellington as sendeling opgelei. En die sendelinge het vir hulleself die erenaam Donkies toegeëien. Soos die donkie Jesus Jerusalem ingedra het, so dra hulle die evangelie die wêreld in. Op die rug van donkies…